Ստամբուլում տեղի է ունեցել Թուրքիայի, Ադրբեջանի և Վրաստանի արտգործնախարարներ Հաքան Ֆիդանի, Ջեյհուն Բայրամովի և Մակա Բոչորիշվիլիի 10-րդ եռակողմ հանդիպումը, որի արդյունքներով ստորագրվել է «Ստամբուլի հռչակագիր»-ը։ Արտգործնախարարները հանդիպումից հետո հանդես են եկել համատեղ մամուլի ասուլիսով։
Հաքան Ֆիդանն ի թիվս այլ հարցերի անդրադարձել է նաև Հարավային Կովկասին, մասնավորապես Հայաստան-Ադրբեջան, Հայաստան-Թուրքիա հարաբերություններին։
«Մենք ևս մեկ անգամ միասին վերահաստատեցինք մեր ընդհանուր ըմբռնումը, որ Հարավային Կովկասում կայունության, խաղաղության և բարգավաճման հաստատումը պետք է ձևավորվի անկեղծ և կառուցողական համագործակցության հիման վրա։ Մենք ցանկանում ենք և աշխատում ենք այն ուղղությամբ, որ մեր տարածաշրջանը հիշատակվի ոչ թե հակամարտություններով, այլ զարգացման նախագծերով, ոչ թե բաժանումներով, այլ ընդհանուր բարեկեցության և կապակցվածության նախագծերով»,- նշել է նա։
Ըստ Ֆիդանի՝ այս տեսլականի ամենահուսադրող արտացոլումն այսօր Թուրքիան տեսնում է Ադրբեջանի և Հայաստանի միջև խաղաղության գործընթացում ու կողմերի ցուցաբերած կամքը տարածաշրջանի համար բացել է հնարավորությունների կոնկրետ պատուհան։
«Մենք աջակցում ենք Ադրբեջանի և Հայաստանի միջև խաղաղության գործընթացին։ Մենք նաև հույս ենք հայտնում, որ Ադրբեջանի լեգիտիմ մտահոգությունները կվերացվեն, և խաղաղության համաձայնագիրը կստորագրվի առանց ուշացման»,- նշել է Ֆիդանը։
Անդրադառնալով Թուրքիա-Հայաստան կարգավորման գործընթացին՝ նա նշել է, որ այն շարունակվում է նույն կերպ՝ Ադրբեջանի հետ սերտ համակարգմամբ։
«Վերջին չորս տարիների ընթացքում ևս կարևոր զարգացումներ են տեղի ունեցել։ Մեր կարծիքով, Հարավային Կովկասի առջև կանգնած հիմնական հնարավորությունն ու նպատակը հետևյալն է․ որքան ամրապնդվի խաղաղության հիմքը, այնքան ավելի ուժեղ արդյունքների կհասնեն կապակցվածության նախագծերը, իսկ որքան ուժեղանա կապակցվածությունը, այնքան ավելի ամուր կերպով կձևավորվի խաղաղության հասարակական և տնտեսական հիմքը։ Մենք վճռականորեն շարունակում ենք մեր աշխատանքը՝ ամրապնդելու այս շրջապտույտը, որը ծառայելու է ողջ տարածաշրջանի ընդհանուր շահերին»,-ընդգծել է Թուրքիայի արտգործնախարարը։
Աղբյուր՝ İndependent Türkçe
