Թուրքական ընդդիմադիր լրատվամիջոցները հայտնում են, որ Թուրքիայում սկսվել են նախապատրաստական աշխատանքները կապված նահանգների թվի ավելացման հետ։ Նշենք, որ Թուրքիայում կա 81 նահանգ ու նախատեսվում է դրանց թիվը ավելացնել 25-ով՝ հասցնելով 106-ի։ Լրատվամիջողները գրում են, որ իշխող «Արդարություն և զարգացում» (ԱԶԿ-AKP) կուսակցությունը դա անում է առաջիկա ընտրությունների համար։
Այս հարցով պաշտոնական օրենքի նախագիծ դեռևս չի ներկայացվել Թուրքիայի մեջլիս, այնուամենայնիվ, իշխող կուսակցությունը նախատեսում է կոնկրետ քայլեր ձեռնարկել այս ուղղությամբ՝ կախված ընտրությունների օրից:
Թուրքիայի «Ազգային շարժում կուսակցության» (ԱՇԿ-MHP) առաջնորդ Դևլեթ Բահչելին 2023-ին ներկայացրել էր «100 նահանգ, 1000 շրջան 100-րդ տարում» նախագիծը, ինչին աջակցել էր ԱԶԿ-ն: Ընդդիմադիր կայքերը գրում են, որ նոր նահանգների ստեղծման համար պետք է բավարարվեն որոշակի չափանիշներ։
Այդ չափանիշներն են՝ բնակչության թիվը առնվազն 100․000 մարդ, շրջանային կենտրոնը առկա քաղաքի կենտրոնից պետք է լինի առնվազն 30 կիլոմետր հեռավորության վրա, տնտեսական զարգացման մակարդակը և տրանսպորտային ենթակառուցվածքները։ Ներկայումս նահանգ դառնալու համար նախատեսված 25 շրջաններում բնակվում է ընդհանուր առմամբ 3մլն 535․454 մարդ։
Աղբյուր՝ Kronos, Sözcü
