Անկարայի քաղաքապետ Մանսուր Յավաշը հայտարարել է Թուրքիայի գլխավոր ընդդիմադիր ուժ համարվող քեմալականների «Ժողովրդահանրապետական» կուսակցությունից (ԺՀԿ- CHP) դուրս գալու և իր քաղաքական գործունեությունն անկախ շարունակելու մասին։
Յավաշը նշել է, որ կուսակցությունից դուրս գալու որոշումը կապված է վերջին շրջանում Թուրքիայում ընթացող քաղաքական և իրավական քննարկումների, ինչպես նաև կուսակցության ներսում առկա տարաձայնությունների հետ։ Նա ընդգծել է, որ որոշումը կայացրել է երկար քննարկելուց հետո և պատասխանատվությունը դրա համար ինքն է ստանձնում։
Նրա խոսքով՝ մարտի 19-ից սկսված և հետագայում, այդ թվում՝ Անկարայի վերաքննիչ դատարանի կողմից 2023թ. նոյեմբերյան համագումարը անվավեր ճանաչելու շուրջ քննարկումներով շարունակված գործընթացը Թուրքիայի քաղաքականությունը հասցրել է այնպիսի վիճակի, որը հասարակությունը մտահոգությամբ է հետևում։
Յավաշը հայտարարել է, որ CHP-ի անդամությունից դուրս է գալիս «այսօր արված որոշ հայտարարությունների պատճառով» և իր քաղաքական ճանապարհը շարունակելու է անկախ կարգավիճակով։ Միաժամանակ նա ընդգծել է, որ Անկարայի քաղաքապետի պաշտոնում շարունակելու է աշխատել՝ անկախ քաղաքական պատկանելությունից։
Նա նաև պնդել է, որ ընդդիմության ներսում տարաձայնությունները չպետք է վերածվեն միմյանց քաղաքականապես սպառելու գործընթացի՝ ընդգծելով, որ ընտրողների վստահությունը վերականգնելու պատասխանատվությունը քաղաքական ուժերն իրենք պետք է ստանձնեն։
Նա նաև հայտարարել է, որ ընտրողների կամքը չպետք է անտեսվի․ «Ընտրողի կամքին հավատարմությունը քաղաքականության պատիվն է»։
Մանսուր Յավաշը Թուրքիայի նախագահի հնարավոր թեկնածուներից է։ Նրա անունը վերջին շրջանում հաճախ է շրջանառվել որպես ընդդիմության՝ առաջիկա նախագահական ընտրություններում հնարավոր թեկնածու, թեև Յավաշն ինքը դեռ պաշտոնապես չի հայտարարել նախագահական ընտրություններին մասնակցելու մասին։
Աղբյուր՝ Trthaber
