Սիրիայի նախագահ Ահմեդ ալ-Շարան ՄԱԿ-ի գլխավոր ասամբլեայի 81-րդ նստաշրջանի շրջանակներում մասնակցել է «Ատլանտյան խորհրդի» կողմից կազմակերպված քննարկմանը։ Նա անդրադարձել է Սիրիային առնչվող հարցերին, տարածաշրջանային հարաբերություններին, քրդերի իրավունքներին և Սիրիայում օտարերկրյա ռազմական ներկայությանը։
Խոսելով քրդերի իրավունքների մասին՝ նա նշել է, որ քրդերը Սիրիայի հասարակության մաս են կազմում ու նրանց մշակութային ու լեզվական իրավուքնների ճանաչումն օրինական իրավունք է։ Անդրադառնալով Սիրիայում ռուսական ու թուրքական ռազմական ներկայությանը՝ ալ-Շարան նշել է, որ Ռուսաստանի ռազմական ներկայությունը մոտ 170-ից կրճատվել է՝ հասնելով 2 ռազմաբազայի։
Ըստ Սիրիայի նախագահի՝ պայմանավորվածություն է ձեռք բերվել այդ բազաներն օգատագործել սիրիական բանակի մարզումների ու կարողությունների զարգացման համար։ Նա նշել է, որ այդ ռազմաբազաները չեն կարող կիրառվել այլ երկրների դեմ ռազմական գործողությունների դեպքում։
Անդրադառնալով Սիրիայում Թուրքիայի ռազմական ներկայությանը՝ ալ-Շարան հայտնել է, որ Անկարան անցյալում պահպանել է ռազմական ներկայությունը երկրի հյուսիս-արևմուտքում՝ սահմանային անվտանգության վերաբերյալ մտահոգությունների պատճառով։
Ըստ նրա՝ ժամանակի ընթացքում տարածաշրջանում թուրքական ռազմական կետերի թիվը նվազել է և բանակցություններ են ընթանում մնացած ռազմական ներկայության իրավական կարգավիճակը որոշելու համար։ Ալ-Շարան ընդգծել է, որ նպատակն է այս կարգավիճակը հաստատել Սիրիայի ժողովրդական ժողովի կողմից հաստատված իրավական շրջանակում։
Աղբյուր՝ Anka
