Թուրք լրագրող Իլքեր Իսմայիլ Դուրաքը հոդված է հրապարակել Մալաթիայի հայկական ժառանգհության վերաբերյալ։ Հոդվածում լրագրողը նշել է, որ Մալաթիան պատմության ընթացքում եղել է տարբեր ժողովուրդների ու մշակույթների համակեցության վայր։ Դրանց թվում հայերը երկար տարիներ կարևոր դեր են ունեցել քաղաքի սոցիալ-տնտեսական կյանքում։ Թեև այսօր նրանց թիվը զգալիորեն նվազել է, սակայն երբեմնի հայկական թաղամասերն ու բնակավայրերը շարունակում են հիշեցնել անցյալի բազմազանությունը։
Քաղաքի կենտրոնը հայաբնակ էր՝ հատկապես ներկայիս Չավուշօղլու թաղամասի շրջակայքը, որտեղ գտնվում էր Սուրբ Երրորդություն կամ Թաշհորոն եկեղեցին։ Հայկական բնակչություն կար նաև Յենի համամ և Ֆըրընջը թաղամասերում։
Մալաթիայի գավառներում ևս հայերը խոշոր ներկայություն ունեին։ Արաբկիրը առանձնանում էր բազմաթիվ եկեղեցիներով ու դպրոցներով և մեծաթիվ հայ համայնքով։ Արգուվանում, հատկապես գյուղերում, հայերն էին բնակվում։ Հեքիմհանն իր հերթին հայտնի էր հայ վարպետներով, որոնք զբաղվում էին առևտրով ու արհեստներով։ Դարենդեում ևս կային հայկական թաղամասեր, իսկ հին եկեղեցիների ու դպրոցների ավերակները մինչ օրս վկայում են այդ մասին։ Դողանշեհիրի, Փյութուրգե և Յեշիլյուրթի որոշ գյուղեր նույնպես հիշատակվում են որպես հայկական բնակավայրեր։
Հայերը Մալաթիայում հիմնականում զբաղվում էին խաղողագործությամբ, գինեգործությամբ, քարագործությամբ ու երկաթագործությամբ։
«Թեև այսօր համայնքը գրեթե վերացել է, սակայն նախկին հայկական բնակավայրերը շարունակում են վկայել քաղաքի բազմամշակութային անցյալի մասին»,- եզրափակում է թուրք լրագրողն իր հոդվածը։
Աղբյուր՝ yenimalatya.com.tr
