Թուրքիայի արդյունաբերության և տեխնոլոգիաների նախարար Մեհմեթ Ֆաթիհ Քաջըրը հայտնել է, որ Թուրքիան Անտարկտիդայում հետազոտական բազա կհիմնի։ Ըստ նախարարի՝ հետազոտական բազայի բոլոր նախապատրաստական աշխատանքներն ավարտվել են, իսկ շրջակա միջավայրի վրա ազդեցության գնահատման ուսումնասիրություններն իրականացվել և, ըստ այդմ, առաջիկայում այդ մշտական բազան կկառուցվի։
Քաջըրը նշել է, որ Չիլին այն երկրներից մեկն է, որի հետ Թուրքիան ամենաուժեղ համագործակցությունն ունի բևեռային հետազոտությունների ոլորտում։ Աշխարհագրական դիրքի պատճառով հետազոտողները նախ ուղարկվում են Չիլի և այնտեղից էլ մեկնում են Անտարկտիդա։ Ըստ նախարարի՝ Չիլին նույնպես ունի հետազոտական բազաներ Անտարկտիդայում, և թուրք հետազոտողները օգտվում են այդ բազաներից։
«Անտարկտիդան և Արկտիկան, ըստ էության, աշխարհի լաբորատորիաներ են։ Դրանք տարածաշրջաններ են, որտեղ կլիման և կենսապայմանները չեն հանդիպում աշխարհի այլ մասերում։ Հետևաբար, մեր գիտնականները հնարավորություն ունեն այս տարածաշրջաններում հետազոտություններ անցկացնել տարբեր ոլորտներում՝ կլիմայի փոփոխությունից մինչև բժշկություն։ Մեր նպատակն է կառուցել թուրքական անտարկտիկական գիտական բազա, որը կդարձնի այս հնարավորությունները մշտական»,-ընդգծել է նա։
Քաջըրը նաև հայտնել է, որ այդ նախագիծը կիրակացվի 2030-ի արդյունաբերության և տեխնոլոգիաների ռազմավարության շրջանակներում։ Կարևոր դիվանագիտական քայլ է Թուրքիայի համար Անտարկտիդայի պայմանագրի խորհրդում խորհրդատվական կարգավիճակ ստանալը։
Աղբյուր՝ Hürriyet
