Թուրքիայի արդարադատության նախարար Աքըն Գյուրլեքը հայտնել է, որ հունիսի 1-ից ի վեր երկրի 22 նահանգում բռնկված 64 անտառային հրդեհի վերաբերյալ հարուցված հետաքննությունների շրջանակում պարզվել է 43 կասկածյալի ինքնություն: Նրանցից 11-ը կալանավորվել են, իսկ 18-ի նկատմամբ կիրառվել է դատական հսկողություն:
Ըստ նախարարի տրամադրած տվյալների՝ միայն վերջին շաբաթվա ընթացքում 8 նահանգում, այդ թվում՝ Անթալիայում, Այդընում և Սինոփում տեղի ունեցած 10 հրդեհի գործով բերման է ենթարկվել 6 մարդ: Հետաքննությունների արդյունքում պարզվել է, որ որոշ հրդեհներ առաջացել են միտումնավոր (դիտավորությամբ), իսկ մյուսները՝ անփութության և անզգուշության հետևանքով: Հրդեհների պատճառ են դարձել, մասնավորապես, եռակցման աշխատանքների կայծերը, աղբի կամ չոր խոտի այրումը, ինչպես նաև էլեկտրական սարքավորումների սարքին չլինելը:
Գյուրլեքը շեշտել է, որ հետաքննությունները շարունակվում են. «Մեր «Կանաչ հայրենիքի» դեմ ոտնձգություն անողները պատասխան կտան արդարադատության առջև: Ոչ մի հրդեհի հեղինակ անհայտ չի մնա»:
Աղբյուր՝ Hürriyet
