Քուրդ ընդդիմադիր. «Թո՛ղ Թուրքիան դառնա Սիրիայի երաշխավոր երկիրը»

Թուրքիայում գործող ընդդիմադիր «Ժողովուրդների հավասարության և ժողովրդավարության» (DEM) կուսակցության համանախագահ, ազգությամբ քուրդ քաղաքական գործիչ Թունջեր Բաքըրհանը հայտարարել է, որ Սիրիայում ապրող քրդերի համար անհրաժեշտ է ապահով և կայուն միջավայր, իսկ Թուրքիան կարող է հանդես գալ որպես այդ գործընթացի երաշխավոր երկիր։

Բաքըրհանը այս մասին ասել է «Sözcü» հեռուստաընկերության եթերում՝ անդրադառնալով Սիրիայի ուղղությամբ Թուրքիայի քաղաքականությանը, Սիրիայում շարունակվող հակամարտություններին և «Սիրիայի դեմոկրատական ուժերի» (SDG) գործողություններին:

Անդրադառնալով թուրք-քրդական լարվածություններին՝ նա հիշեցրել է, որ 1924 թվականին, երբ հնչել է «մենք բոլորս թուրք ենք» ձևակերպումը, որոշ շրջանակներ արձագանքել են՝ ասելով «մենք մուսուլման ենք», և հենց այդ պահից էլ, ըստ նրա, սկսել են խորքային խնդիրները։ «Իրականում քրդերը երբեք թուրքերի դեմ չեն կանգնել, չեն պատերազմել նրանց դեմ»,- նշել է Բաքըրհանը։

«DEM»-ի ազգությամբ քուրդ համանախագահը հիշեցնելով, որ 3 անգամ ազատազրկվել է, ասել է. «Արդյո՞ք կարելի է իրեն համարել բանտ «սիրող» մարդ։ Ամենից շատ ես եմ ցանկանում լուծում և ժողովրդավարություն։ Ուզում եմ երեխաներիս հետ խաղաղ ապրել, գիշերը հանգիստ քնել՝ առանց վախի, որ առավոտյան ժամը չորսին դուռս կթակեն»:

Բաքըրհանը ընդգծել է, որ չի ցանկանում լինել խորհրդարանում այնպիսի պատգամավոր, ում վրա մատ են թափ տալիս կամ ում նկատմամբ մշտական ճնշում է գործադրվում։ «Մենք գլուխներս հացի հերթի տա՞կ ենք դրել։ Այս խնդիրը այնքան էլ բարդ չէ»,- հավելել է նա։

Եզրափակելով՝ համանախագահը շեշտել է. «Քրդերը այնտեղ պետք է ապրեն անվտանգ պայմաններում։ Թուրքիան թո՛ղ դառնա այդ գործընթացի երաշխավոր երկիրը»։

Աղբյուր՝ Rudaw