Թուրքիայի և ԱՄԷ-ի ղեկավարները քննարկել են երկկողմ հարաբերությունները

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Արաբական Միացյալ Էմիրությունների (ԱՄԷ) նախագահ Շեյխ Մոհամմեդ բին Զայեդ Ալ Նահյանի հետ։

Թուրքիայի նախագահականին կից հանրային կապերի վարչության տարածած հաղորդագրության համաձայն՝ զրույցի ընթացքում կողմերը քննարկել են երկու երկրների միջև համագործակցության հնարավորությունները, ինչպես նաև հարաբերությունները համատեղ շահերի և ժողովուրդների բարօրության հիման վրա առավել ամրապնդելու ուղղությամբ ձեռնարկվելիք քայլերը։

Կողմերը վերահաստատել են, որ վճռական են խորացնելու ԱՄԷ-Թուրքիա հարաբերությունները՝ հիմնվելով հատկապես զարգացման գործընկերության շրջանակում արձանագրված առաջընթացի վրա։

Զրույցի ընթացքում երկու երկրների ղեկավարները նաև անդրադարձել են տարածաշրջանային և միջազգային օրակարգի փոխադարձ հետաքրքրություն ներկայացնող հարցերին, տարածաշրջանում տեղի ունեցող վերջին զարգացումներին և այդ ուղղությամբ իրականացվող աշխատանքներին։

Կողմերը նշել են, որ իրենց հանդիպումը հետաձգվել է, սակայն վերահաստատել են, որ հնարավորինս կարճ ժամկետում կհանդիպեն։

Աղբյուր՝ Trt Haber