Էրդողանի խոսքով՝ արտահերթ ընտրությունների հարց օրակարգում չկա

Թուրքիայի նախագահ Ռեջեփ Թայիփ Էրդողանը կառավարության նիստից հետո հայտարարել է, որ երկրում արտահերթ կամ միջանկյալ ընտրություններ անցկացնելու հարց օրակարգում չկա։ Նա այս կերպ արձագանքել է Թուրքիայի գլխավոր ընդդիմադիր ուժը համարվող քեմալականների «Ժողովրդահանրապետական» կուսակցության (ԺՀԿ-CHP) առաջնորդ Օզգյուր Օզելի կոչին՝ այն անվանելով «արհեստական օրակարգ»: Էրդողանը նաև ընդգծել է, որ «ոչ ոք չի կարող սին քննարկումներով շեղել Թուրքիայի օրակարգը»։

Թուրքիայի նախագահն անդրադարձ է կատարել քրդական հարցին՝ նշելով, որ խորհրդարանի համապատասխան հանձնաժողովի զեկույցը կարող է ուղղություն տալ գործընթացին: Այս համատեքստում վերջինս շեշտել է «Թուրքիան առանց ահաբեկչության» տեսլականի կարևորությունը։

Խոսելով տարածաշրջանային զարգացումներից՝ Էրդողանը նշել է, որ Իրան-ԱՄՆ-Իսրայել լարվածությունը, ինչպես նաև Հորմուզի նեղուցի հնարավոր փակումը կարող են լուրջ ազդեցություն ունենալ համաշխարհային տնտեսության վրա։ Էրդողանի խոսքով՝ Թուրքիան շարունակում է դիվանագիտական ջանքեր գործադրել հակամարտության դադարեցման ուղղությամբ։

Աղբյուր՝ Arti Gerçek