Թուրքիայի նախագահ Ռեջեփ Թայիփ Էրդողանը Ղազախստանում է: Վերջինս Աստանայում մի շարք երկկողմ պաշտոնական հանդիպումներ է ունենալու, ապա Թյուրքիստանում մասնակցելու է «Թյուրքական պետությունների կազմակերպության (ԹՊԿ-TDT) անդամ պետությունների ղեկավարների ոչ պաշտոնական գագաթնաժողովին»:
Նախատեսվում է նաև Էրդողանի առանձնազրույցը Ղազախստանի նախագահ Կասիմ Ժոմարտ Տոկաևի հետ, ինչից հետո վերջիններս միասին նախագահելու են «Թուրքիա-Ղազախստան բարձր մակարդակի ռազմավարական համագործակցության հանձնաժողովի նիստը»:
Թուրքիայի նախագահի հանդիպումների օրակարգում է լինելու «զարգացված ռազմավարական գործընկերությանը» վերաբերող երկկողմ համագործակցության բոլոր ուղղություններին վերաբերող հարցեր, ինչպես նաև քննարկվելու են երկու պետությունների միջև առկա ռազմավարական կապերի ամրապնդման ուղղությամբ իրականացվելիք քայլերը:
Տնտեսության տեսանկյունից օրակարգային է լինելու երկկողմ առևտրաշրջանառությունը 15 մլրդ դոլար հասցնելու նպատակի վերաբերյալ հարցերը: Օրակարգից դուրս չեն մնալու նաև էներգետիկայի ոլորտում առկա համագործակցության ծրագրերը: Նշվում է, որ այս համատեքստում նախատեսվում է նաև տարբեր ոլորտներին վերաբերող նոր համագործակցությունների արձանագությունների և համաձայնագրերի ստորագրման արարողություն:
Այցի շրջանակներում Էրդողանն ու Տոկաևը մասնակցելու են նաև «Թուրքիա-Ղազախստան բիզնես համաժողովին», ինչի շրջանակներում հանդիպելու են երկու երկներում գործունեություն ծավալող գործարարների հետ և քննարկելու են ներդրումային հնարավորությունները:
Աստանայում շփումների հետո Թուրքիայի նախագահը մեկնելու է թյուրքական պետությունների «հոգևոր մայրաքաղաքը համարվող» Թյուրքիստան, որտեղ էլ հենց կայանալու է ԹՊԿ-ի ոչ պաշտոնական գագաթնաժողովը: Գագաթնաժողովում Էրդողանն ուղերձներ է փոխանցելու Մերձավոր Արևելքում տեղի ունեցող զարգացումներիի, ինչպես նաև տարածաշրջանային և համաշխարհային նշանակության խնդիրների վերաբերյալ: Այս պարագայում ևս Թուրքիայի նախագահը երկկողմ հանդիպումներ է ունենալու:
Աղբյուր՝ Trt Haber
