Բաքվում տեղի Է ունեցել Թուրքիայի, Ադրբեջանի ու Վրաստանի խորհրդարանների արտաքին հարաբերությունների հանձնաժողովների 10-րդ եռակողմ հանդիպումը։
Հանդիպմանը մասնակցել են Թուրքիայի Ադրբեջանի ու Վրաստանի խորհրդարանների արտաքին հարաբերությունների հանձնաժողովների նախագահներ՝ Ֆուաթ Օքթայը, Սամեթ Սեյիդովը և Նիկոլոզ Սամխարաձեն։ Անդրադառնալով Հրվ. Կովկասին՝ Օքթայը նշել է, որ խաղաղությունն ու կայունությունը մշտապես առաջնային են եղել Թուրքիայի համար և իրենք աջակցում են Ադրբեջան-Հայաստան խաղաղության գործընթացի հաջող ավարտին։
Նշելով, որ բոլոր հարևանների հետ կառուցողական հարաբերությունների պահպանումը Թուրքիայի արտաքին քաղաքականության հիմնարար սկզբունքներից մեկն է, Օքթայը ընդգծել է.
«Ադրբեջանի ու Հայաստանի միջև հարաբերությունների կարգավորման շրջանակներում մենք այս ոգով շարունակում ենք Հայաստանի հետ հարաբերությունների կարգավորման գործընթացը»։
Ըստ Օքթայի՝ «Թրամփի միջազգային խաղաղության և բարգավաճման երթուղին (TRIPP), որը կկապի Ադրբեջանի մայր տարածքը Նախիջևանի հետ, զգալի տնտեսական թափ կհաղորդի Հարավային Կովկասին, և դրանից Վրաստանն էլ կշահի։
Խոսելով Իրանի շուրջ ստեղծված լարվածության մասին՝ Օքթայը նշել է.
«Մենք աջակցում ենք ԱՄՆ-ի և Իրանի միջև բանակցությունների շարունակությանը։ Մենք փորձում ենք օգնել այդ հարցում։ Իրանում լայնամասշտաբ անկայունությունը լրջորեն կթուլացնի տարածաշրջանային կայունությունը։ Մեր տարածաշրջանը չի կարող դիմակայել ևս մի տևական ճգնաժամի։ Այդ պատճառով կողմնակից ենք երկխոսությանն ու դիվանագիտությանը»։
Օքթայը նաև հանդիպել է Ադրբեջանի խորհրդարանի նախագահ Ս. Գաֆարովայի հետ: Քննարկվել են Թուրքիայի ու Ադրբեջանի միջև ռազմավարական գործընկերությանը վերաբերող հարցեր, տարածաշրջանային զարգացումները և միջխորհրդարանական հարաբերությունների ամրապնդումը:
Աղբյուր՝ Yeni Şafak
