Այսպես կոչված Հյուսիսային Կիպրոսի Թուրքական Հանրապետության նախագահական ընտրությունների արդյունքները, ինչպես նաև դրանց ազդեցությունը տարածաշրջանային և միջազգային քաղաքականության վրա, վերլուծել է Կիպրոսյան Ձախ շարժման արտաքին հարաբերությունների քարտուղար, քաղաքական վերլուծաբան Աբդուլլահ Քորքմազհանը։
Քորքմազհանի խոսքով՝ նոր ընտրված ղեկավար Թուֆան Էրհուրմանի հաղթանակը պայմանավորված էր ոչ միայն ընդդիմադիր ուժերի համախմբմամբ, այլև գործող ղեկավարի՝ Էրսին Թաթարի նկատմամբ հասարակական դժգոհությամբ։ Նա նշել է, որ Թուրքիայի իշխանությունները այս անգամ ընտրություններին ուղղակի միջամտությունից զերծ մնացին, ինչը թույլ տվեց արդյունքների բնական ընթացք ապահովել։
Քաղաքական վերլուծաբանը նաև ընդգծել է, որ Իսրայելի և Թուրքիայի միջև աճող լարվածությունը և նրանց տարածաշրջանային մրցակցությունը անմիջականորեն ազդում են Կիպրոսի վրա։ Նրա խոսքով՝ երկու երկրներն էլ փորձում են վերահսկել Արևելյան Միջերկրականի ռազմավարական տարածքները, և այս մրցակցությունը արտացոլվում է նաև Կիպրոսի քաղաքական զարգացումներում։
Քորքմազհանը հավելել է, որ եթե Անկարան շարունակի պնդել «երկու պետության» քաղաքական գիծը, ապա Կիպրոսի հարցով նոր բանակցություններ չեն սկսվի, քանի որ ՄԱԿ-ի և միջազգային հանրության դիրքորոշումը հստակ է՝ միայն ֆեդերալ հիմքով միավորված Կիպրոսն է դիտարկվում որպես ընդունելի լուծում։
Նրա կարծիքով՝ Էրհուրմանի առաջիկա շրջանը լինելու է բարդ․ պետք է ոչ միայն բանակցային գործընթացը վերականգնի, այլև պայքարի կոռուպցիայի, փողերի լվացման և քրեական ցանցերի դեմ, որոնք Կիպրոսում խոր արմատներ են գցել Թուրքիայի հետ կապերի միջոցով։
Աղբյուր՝ Bianet
