Եվրամիությունը (ԵՄ) ուշադրության կենտրոնում է պահում Թուրքիայի տարածքով անցնող նավթային հոսքերը՝ կասկածելով, որ ռուսական նավթը կարող է այլընտրանքային մեթոդներով մուտք գործել եվրոպական շուկա՝ շրջանցելով ԵՄ-ի սահմանած էներգետիկ պատժամիջոցները։
Արևմտյան լրատվամիջոցների և տվյալների վերլուծությամբ զբաղվող ֆրանսիական «Kpler» ընկերության տեղեկությունների համաձայն՝ Թուրքիայի որոշ էներգետիկ տերմինալներ, մասնավորապես Մերսինի և Մարմարայի տարածաշրջաններում, կարող են միջնորդ օղակ հանդիսանալ ռուսական նավթի վերաարտահանման գործընթացում։
Նշվում է, որ ռուս-ուկրաինական պատերազմի մեկնարկից հետո ԵՄ-ն փորձում է պարզել՝ արդյոք իր սահմանած էներգետիկ արգելքները չեն շրջանցվում նավթի ծագումը «քողարկելու» միջոցով։ Թեև Թուրքիան պաշտոնապես չի միացել Ռուսաստանի դեմ պատժամիջոցներին և իրավական հիմքով շարունակում է էներգետիկ առևտուրը Մոսկվայի հետ, ԵՄ-ում մտահոգություններ կան, որ այդ նավթը կարող է վերամշակվելուց կամ խառնվելուց հետո հայտնվել նաև եվրոպական շուկաներում։
Վերլուծաբանների կարծիքով՝ նման մեխանիզմները թուլացնում են պատժամիջոցների արդյունավետությունը, ինչի արդյունքում ԵՄ-ն կարող է խստացնել վերահսկողությունը և անգամ քննարկել նոր սահմանափակումներ առանձին նավահանգիստների ու տերմինալների նկատմամբ։
ԵՄ-ի «REPowerEU» ռազմավարության շրջանակում ռուսական վառելիքից լիարժեք հրաժարվելու նպատակը, ըստ գնահատականների, կարող է Թուրքիայի էներգետիկ դերակատարումը դարձնել նոր լարվածության աղբյուր ԵՄ–Թուրքիա հարաբերություններում։
Աղբյուր՝ Kronos
