«Hürriyet»-ում հոդվածներ հեղինակող թուրք լրագրող Հանդե Ֆըրաթն անդրադարձել է սիրիական իշխանությունների և Սիրիայի դեմոկրատական ուժերի (SDG) միջև ձեռք բերված հրադադարի և ինտեգրման համաձայնությանը՝ այն բնութագրելով որպես «նոր Սիրիայի» ձևավորման շրջադարձային փուլ։ Նրա գնահատմամբ՝ 14 կետից բաղկացած համաձայնությունը կարող է փոխել ոչ միայն Սիրիայի ներքին կառուցվածքը, այլև տարածաշրջանային և Թուրքիայի անվտանգության հաշվարկները։
Ֆըրաթը գրում է, որ համաձայնության շրջանակում Ռակկան և Դեյր էզ-Զորն անցել են Սիրիայի կենտրոնական իշխանության վերահսկողության ներքո, իսկ Հասաքեում սկսվել է պետական կառույցների ամբողջական ինտեգրում Սիրիայի պետությանը։ Միաժամանակ նշվում է, որ քրդական քաղաքական ներկայացվածությունը պահպանվում է տեղական վարչական պաշտոնների միջոցով, իսկ քրդերենը Սիրիայի պատմության մեջ առաջին անգամ ստացել է պաշտոնական կարգավիճակ։ Ըստ հեղինակի՝ սա թուլացնում է PKK-ի (ՔԲԿ–Քուրդիստանի բանկվորական կուսակցություն) զինված ներկայության հիմնավորումները։
Հատուկ ուշադրություն է դարձվում նաև Մազլում Աբդիի հայտարարած պարտավորությանը՝ PKK-ականների Սիրիայի տարածքից դուրսբերման վերաբերյալ, ինչը թուրքական կողմում դիտարկվում է որպես դիվանագիտական կարևոր ձեռքբերում։ Ֆըրաթը նշում է, որ նավթի, գազի և սահմանային անցակետերի վերահսկողության փոխանցումը պետությանը զրկում է Սիրիայի դեմոկրատական ուժերին տնտեսական ինքնուրույնությունից, իսկ Հոլի և Ռոժի ճամբարների փոխանցումը Դամասկոսին ունի լուրջ նշանակություն միգրացիոն և անվտանգության ռիսկերի տեսանկյունից։ Նրա գնահատմամբ՝ համաձայնությունը նպաստում է Սիրիայի պետական ինքնիշխանության վերականգնմանը՝ տեղական կառավարման մոդելով և զինված կառույցների փոխարինմանը քաղաքացիական մեխանիզմներով։
Աղբյուր՝ t24.com.tr
