Դաշտային վերջին տվյալների և արբանյակային լուսանկարների համաձայն՝ Թուրքիան ակտիվորեն ներգրավված է Աֆրիկայում ընթացող ռազմական գործընթացներում՝ հատկապես Սուդանում և Սոմալիում։ Հաղորդվում է, որ Սուդանի ներքին հակամարտության շրջանակում Եգիպտոսի տարածքում գտնվող Շարկ Ուվեյնաթ ավիաբազայից օդ են բարձրացել թուրքական արտադրության «Bayraktar Akıncı» տեսակի հարվածային անօդաչու թռչող սարքեր (ԱԹՍ), որոնք օգտագործվել են Սուդանի բանակի կողմից՝ «Արագ արձագանքման ուժերի» դիրքերի դեմ։ Նշվում է, որ օդային հարվածները զգալիորեն փոխել են ռազմական հավասարակշռությունը Սուդանի բանակի օգտին։
Միաժամանակ Թուրքիան ուժեղացրել է իր ռազմական ներկայությունը Սոմալիում։ Տեղեկությունների համաձայն՝ Մոգադիշոյի օդային տարածքում իրականացվել են թուրքական «F-16» կործանիչների թռիչքներ, որոնք գնահատվում են որպես կանխարգելիչ և զսպող քայլ տարածաշրջանային անվտանգության ապահովման նպատակով։
Բացի այդ, Սոմալիի Օրաթ Շաբելլե շրջանում ակտիվացվել է «Vargati» նոր ավիաբազան, իսկ Սոմալիի ռազմաօդային ուժերի վերակազմավորման գործընթացում Թուրքիան համատեղ քայլեր է իրականացնում Պակիստանի հետ։ Միջազգային դիտորդների գնահատմամբ՝ Անկարայի այս քայլերը վկայում են Աֆրիկայում Թուրքիայի ռազմական ու ռազմավարական ազդեցության շարունակական ընդլայնման մասին։
Աղբյուր՝ Baran Dergisi
