Թուրքիայի ազգային անվտանգության խորհուրդը (ԱԱԽ) Թուրքիայի նախագահ Ռեջեփ Թայիփ Էրդողանի գլխավորությամբ կգումարի ընթացիկ տարվա 3-րդ նիստը:
Նիստի օրակարգը կլինի ԱՄՆ-ի և Իրանի միջև համաձայնությունը, Միջերկրական ծովի արևելյան հատվածում տեղի ունեցող զարգացումները և «Թուրքիան առանց ահաբեկչության» գործընթացը: Կքննարկվեն նաև տարածաշրջանային և միջազգային անվտանգությանը վերաբերող այլ հարցեր:
Ըստ այդմ՝ կքննարկվեն այն աշխատանքները, որոնք պետք է իրականացվեն Վաշինգտոն-Թեհրան համաձայնությունը լիարժեք կիրառելու և բանակցային գործընթացը հաջողությամբ ավարտին հասցնելու ուղղությամբ: Անդրադարձ կկատարվի նաև Իսրայելի՝ Պաղեստինի և Լիբանանի դեմ իրականացվող հարձակումներին:
Օրակարգից անմասն չի մնա Կիպրոսի և Ֆրանսիայի միջև ռազմական համաձայնագրի ստորագրումը: Նիստի ընթացքում կմատնանշվեն այն քայլերը, որոնք պետք է իրականացվեն՝ Թուրքիայի և Կիպրոսի թուրք ժողովրդի իրավունքների ու շահերի պաշտպանության տեսանկյունից:
Նշվում է, որ պետության համապատասխան կառույցները շարունակում են իրենց աշխատանքը տարբեր մեթոդների շուրջ, որոնք կարագացնեն ահաբեկչական կազմակերպության լուծարման գործընթացը: Նիստում կգնահատվեն թե՛ այս աշխատանքները, թե՛ թեմայի շուրջ վերջին զարգացումները: Կքննարկվի նաև Սիրիայում և Իրաքում տիրող իրավիճակը:
Ակնկալվում է, որ նիստում մտքեր կփոխանակվեն նաև Ռուսաստան-Ուկրաինա պատերազմի ու հուլիսի 7-8-ը կայանալիք ՆԱՏՕ-ի գագաթնաժողովի նախապատրաստական աշխատանքների շուրջ:
Աղբյուր՝ Trt Haber
