Թուրքիայի արտգործնախարար Հաքան Ֆիդանն Իրաք կատարած պաշտոնական այցի շրջանակում Բաղդադում հանդիպել է Իրաքի վարչապետ Մուհամմեդ Շիա աս–Սուդանի հետ։ Հանդիպումից հետո Ֆիդանը և Իրաքի փոխվարչապետ, արտգործնախարար Ֆուադ Հուսեյնը ստորագրել են «Թուրքիայի Հանրապետության և Իրաքի Հանրապետության կառավարությունների միջև ջրային համագործակցության շրջանակային համաձայնագրի ներքո իրականացվելիք նախագծերի ֆինանսավորման մեխանիզմի» փաստաթուղթը։
Անկարայի դիվանագիտական աղբյուրների փոխանցմամբ՝ նոր մեխանիզմը նախատեսված է 2024-ի ապրիլին Թուրքիայի նախագահ Ռեջեփ Թայիփ Էրդողանի իրաքյան այցի ընթացքում ստորագրված «Ջրային համագործակցության շրջանակային համաձայնագրի» իրագործման համար։
Փաստաթղթի համաձայն՝ Իրաքում ջրային ենթակառուցվածքների արդիականացման և կառուցման ծրագրերը կիրականացվեն թուրքական ընկերությունների կողմից, իսկ դրանց ֆինանսավորումը կապահովվի իրաքյան նավթի վաճառքից ստացվող եկամուտներով։
Այս նախաձեռնությունը նպատակ ունի խթանել երկու երկրների համագործակցությունը ջրային ռեսուրսների արդյունավետ և կայուն օգտագործման ուղղությամբ, ինչպես նաև հնարավորություն տալ թուրքական շինարարական ընկերություններին ավելի լայնորեն ներգրավվել Իրաքի շուկայում։
Նշենք, որ 2024-ի ապրիլի 22-ին ստորագրված «Ջրային համագործակցության շրջանակային համաձայնագիրը» և այժմ ստորագրված «Ֆինանսավորման մեխանիզմի» փաստաթուղթը դիտվում են որպես երկու երկրների տնտեսական և ռազմավարական հարաբերությունների զարգացման նոր փուլ։
Տարածաշրջանում կլիմայական փոփոխությունների հետևանքով ջրի պաշարների նվազման պայմաններում այս համագործակցությունը որակվում է որպես երկարաժամկետ լուծումների որոնման կարևոր քայլ՝ ուղղված ինչպես Իրաքի, այնպես էլ Թուրքիայի ջրապահովման անվտանգության ամրապնդմանը։
Աղբյուր՝ CNN TÜRK
