Հյուսիսային Կիպրոսի ինքնահռչակ թուրքական հանրապետության նախկին նախագահ Մուստաֆա Աքընջըն, մեկնաբանելով հոկտեմբերի 19-ի Կիպրոսի հյուսիսում անցկացված «նախագահական ընտրությունների» արդյունքները, նշել է, որ ընդդիմադիր թեկնածու Թուֆան Էրհուրմանի հաղթանակը հանգստացրել է կիպրացի թուրքերին։
Աքընջըն շեշտել է, որ եթե գործող վարչակարգը ևս հինգ տարի շարունակվեր, ապա այդ տարածքը կբերեր «անվերականգնելի վիճակի»։ Նա օրինակ է բերել Թուրքիայի ազգայնական շրջանակների՝ ընտրություններից հետո հնչեցրած «միացման» հայտարարությունները՝ դրանք համարելով վտանգավոր ազդակ։
Նախկին ղեկավարն ընդգծել է, որ պաշտոնը թողնող ներկայիս առաջնորդը «անարժան ստացած պաշտոնը այժմ կհանձնի նրան, ով այն արժանապես վաստակել է»։
Աքընջըն հիշեցրել է, որ 2020 թվականի ընտրությունների ժամանակ Թուրքիայի իշխանությունները միջամտել էին տեղի ընտրական գործընթացին՝ պետական լծակների և ֆինանսական ճնշման միջոցով։ Նրա խոսքով՝ այս անգամ նման միջամտություններ չեն արձանագրվել, ինչն էլ ապահովել է ավելի արդար արդյունք։ Նա Էրհուրմանի հաղթանակը կապել է երեք գործոնի հետ. Թուրքիայում իշխող ուժի ազդեցության նվազումը, նոր նախագահի փորձառությունը և ընդդիմադիր ուժերի համախմբումը։
«Հաղթանակը միայն սկիզբն է, իսկ իրական փորձությունը նոր է սկսվում»,- եզրափակել է Աքընջըն։
Աղբյուր՝ Medyascope
