Թուրքիայի արտգործնախարար Հաքան Ֆիդանը նոյեմբերի 28-ին մեկնելու է Գերմանիա։ Պաշտոնական շփումներից զատ նախատեսվում են Ֆիդանի հանդիպումները Բեռլինի թուրքական համայնքի ներկայացուցիչների և գործարարների հետ։
Ինչպես հայտնում է Թուրքիայի արտգործնախարարությունը, Ֆիդանը հանդիպելու է իր գերմանացի գործընկերոջ՝ Յոհան Վադեֆուլի հետ, ում հրավերով էլ հենց մեկնում է Գրեմանիա։ Ընդգծվում է, որ սա լինելու է Ֆիդանի առաջին երկկողմ այցն այդ երկիր։
Կողմերի միջև կայանալիք հանդիպման օրակարգը հագեցած է․ ակնկալվում է, որ Ֆիդանն ընդգծելու է բարձրաստիճան այցերի շնորհիվ առաջընթաց գրանցող Թուրքիա-Գրեմանիա հարաբերություններում խորհրդակցությունների և երկխոսության մեխանիզմների շրջանակում տարվող աշխատանքների շարունակականության կարևորությունը, գոհունակություն է հայտնելու երկկողմ տնտեսական և առևտրային հարաբերությունների կայուն ամրապնդման վերաբերյալ, ինչպես նաև անդրադառնալու է ռազավարական տեսլականով առաջ շարժվելու հնարավորություններին։
Նախատեսվում է, որ շփումների ընթացքում Թուրքիայի արտգործնախարարը նշելու է, որ կարելի է մեծացնել Գերմանիայի հետ կապակցվածության, արհեստական բանականության, բարձր տեխնոլոգիաների և թվայնացման ու մի շարք այլ ոլորտներում գիտելիքի և փորձի փոխանակումը։
Ակնկալվում է նաև, որ Ֆիդանն անդրադառնալու է մաքսային միության արդիականացման, վիզաների ազատականացման երկխոսության առաջմղման, ինչպես նաև Թուրքիային ԵՄ-ի արդյունաբերական ռազմավարության մեջ ընդգրկվելու հարցերին՝ ներկայացնելով Թուրքիա–ԵՄ հարաբերությունների վերաբերյալ թուրքական կողմից սպասելիքները։
Ֆիդանը կարևոր է համարելու Թուրքիայի և ԵՄ-ի միջև ավելի ուժեղ, ինստիտուցիոնալացված և փոխադարձ վստահության վրա հիմնված համագործակցության զարգացումը։ Նշվում է նաև՝ այս շրջանակում գոհունակություն է արտահայտվելու Թուրքիա–ԵՄ ռազմավարական երկխոսությունը վերսկսելու վերաբերյալ հնչող կառուցողական հայտարարությունների մասով։
Ինչպես նշում է թուրքական աղբյուրը՝ Թուրքիայի արտգործնախարարի Գերմանիա այցը հարուստ օրակարգ է ունենալու և քննարկումներ են լինելու Թուրքա-ԵՄ հարաբերություններից մինչև Պաղեստինի Գազայի հատվածի շուրջ տեղի ունեցող զարգացումների վերաբերյալ։
Աղբյուր՝ Trt Haber
