Թուրքայում գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ-CHP) նախագահի թեկնածու, Ստամբուլի քաղաքապետ Էքրեմ Իմամօղլուն, ով այժմ կալանքի տակ է գտնվում, Սիլիվրիի բանտից թուրքական «T24» պարբերականի թղթակցին տված հարցազրույցում հայտարարել է, որ նախագահի թեկնածությունը շարունակում է մնալ ուժի մեջ։
Իմամօղլուի խոսքով՝ այն ընտրությունը, որում ինքը չի կարողանա ազատ մրցել, չի կարող համարվել լեգիտիմ ընտրություն։ Վերջինս նաև իր դեմ հարուցված «դիպլոմի գործը» որակել է որպես Թուրքիայի իրավական պատմության «սև բիծ»՝ նշելով, որ այդ գործընթացը քաղաքական դրդապատճառներ ունի։
Իմամօղլուն ընդգծելով, որ իր թեկնածությունը 15.5 միլիոն քաղաքացու կամքի արտահայտությունն է՝ հայտարարել է. «Իշխանությունը ազգն է տալիս և ազգն էլ վերցնում այն: Դիպլոմի գործը դեռևս ավարտված չէ, իսկ թեկնածությունս հստակորեն շարունակվում է, սակայն անկախ արդյունքից «ԺՀԿ»-ն ազգային կառավարում ձևավորելու համար կատարելու է մեր ազգի առաջ ստանձնած իր պարտավորությունը»։
Նա նաև նշել է, որ «ԺՀԿ»-ն ունի նախագահական մի քանի հնարավոր թեկնածու և կուսակցությունը որևէ անհանգստություն չունի այդ հարցում՝ միաժամանակ կասկածի տակ դնելով գործող իշխանությունների սահմանադրական սահմանափակումները շրջանցելու հնարավորությունը։
Նշենք, որ Ստամբուլի նախկին քաղաքապետը կալանավորվել էր 2025-ի մարտի 19-ին, իսկ ձերբակալվել՝ մարտի 23-ին: Վերջինս մեղադրվում է կոռուպցիայի, փողերի լվացման և ահաբեկչության հետ կապ ունենալու մեջ։ Ավելի ուշ՝ հուլիսին, փաստաթղթերի կեղծման մեղադրանքների հիման վրա Ստամբուլի համալսարանը չեղարկել էր նաև Իմամօղլուի մագիստրոսական դիպլոմը: Այդ գործով առաջին նիստը տեղի է ունեցել սեպտեմբերին:
Kaynak: Artı Gerçek
