Ռուսաստանի պաշտպանության նախկին նախարար, այժմ անվտանգության խորհրդի քարտուղար Սերգեյ Շոյգուն Մոսկվայում հանդիպել է Թուրքիայի արտգործնախարար Հաքան Ֆիդանի հետ։ Հանդիպման մեկնարկին Շոյգուն բարձր է գնահատել Թուրքիայի հետ համագործակցությունը՝ ընդգծելով, որ նույնիսկ ամենաբարդ իրավիճակներում կողմերին միշտ հաջողվել է գալ ընդհանուր հայտարարի։
Անդրադառնալով Սիրիայում ահաբեկչության դեմ պայքարում վաղուց ի վեր իրականացված համատեղ գործողություններին՝ Շոյգուն այդ ժամանակահատվածը որակել է բարդ, ապա հավելել.
«Սակայն Ռուսաստանն ու Թուրքիան միշտ կարողացել են խնդիրներին համապատասխան լուծումներ գտնել։ Սիրիայում լարվածության նվազեցման գոտիների կամ ահաբեկչության դեմ պայքարի ոլորտներում չի եղել մի հարց, որը մենք չկարողանայինք լուծել»։
Որպես լուծված հարցերի օրինակներ՝ Շոյգուն մեջբերել է Ուկրաինայի նավահանգիստներից թուրքական նավերի վերադարձը, դեպի Թուրքիա հացահատիկի մատակարարումների կազմակերպումն ու որոշ բեռների համար սահմանափակումների վերացումը:
Ռուսաստանի ԱԽ քարտուղարը խոսել է նաև ուկրաինական ճգնաժամի կարգավորմանն ուղղված Թուրքիայի միջնորդական գործողությունների մասին։ Նրա պնդմամբ՝ Մոսկվան և Անկարան արել են ամեն ինչ Ստամբուլի համաձայնագրերի նախապատրաստման և կյանքի կոչման համար։ «Եթե Արևմուտքը չմիջամտեր, այս գործընթացն ավարտին կհասցվեր»,- հավելել է նա։
Շոյգուն նաև անդրադարձել է 2022-ին կնքված «Սևծովյան հացահատիկային միջանցքի» համաձայնագրին՝ շեշտելով, որ Ռուսաստանն ու Թուրքիան լիարժեք կատարել են իրենց պարտավորությունները, մինչդեռ ՄԱԿ-ը թերացել է իր ստանձնած դերում։
Աղբյուր՝ Cumhuriyet
