Պակիստանի արտաքին գործերի նախարարությունը հայտարարություն է տարածել Թուրքիայի, Պակիստանի և Սաուդյան Արաբիայի միջև ստորագրված Մեքքայի համատեղ պաշտպանության համաձայնագրի շրջանակում ձևավորված Մեքքայի պաշտպանական դաշինքի վերաբերյալ։
Հայտարարության համաձայն՝ դաշինքի՝ Սաուդյան Արաբիայի մայրաքաղաք Ռիադում գործող գլխավոր քարտուղար է նշանակվել Պակիստանի բանակի պաշտոնաթող գեներալ-լեյտենանտ Նաուման Մահմուդը։
Նախապես որոշվել էր, որ երեք երկրների միջև ռոտացիոն սկզբունքով իրականացվող գլխավոր քարտուղարի պաշտոնը առաջին երեք տարիներին կզբաղեցնի Պակիստանի ներկայացուցիչը։
Հիշեցնենք, որ Թուրքիայի նախագահ Ռեջեփ Թայիփ Էրդողանը, Սաուդյան Արաբիայի թագաժառանգ Մուհամմադ բին Սալմանը և Պակիստանի վարչապետ Շահբազ Շարիֆը օգոստոսի 7-ին Մեքքայում ստորագրել էին «Համատեղ պաշտպանության համաձայնագիրը»։
Նշվում է, որ Թուրքիայի, Պակիստանի և Սաուդյան Արաբիայի միջև ստորագրված համաձայնագիրը նպատակ ունի տարածաշրջանային և միջազգային մակարդակներում աճող անկայունության պայմաններում խթանել անվտանգությունը, խաղաղությունը, կայունությունն ու բարեկեցությունը, ինչպես նաև ամրապնդել համատեղ զսպման կարողությունները։
Համաձայնագրով սահմանվում է, որ կողմերից որևէ մեկի դեմ ուղղված հարձակումը համարվելու է հարձակում բոլոր կողմերի դեմ։
Փաստաթուղթը նախատեսում է նաև տարածաշրջանում համագործակցության նոր մշակույթի ձևավորում և հնարավորություն է տալիս միանալ այն դերակատարներին, որոնք հարգում են միջազգային իրավունքը և կիսում խաղաղ համագործակցության տեսլականը։
Աղբյուր՝ Trthaber
