Իսրայելի սփյուռքի նախարար Ամիխայ Չիքլին մտահոգություն է հայտնել ԱՄՆ-ի և Իրանի միջև ձեռք բերված համաձայնության ձևավորման գործընթացում Թուրքիայի, Կատարի և Պակիստանի դերակատարության կապակցությամբ։
Իսրայելի վարչապետ Բենիամին Նեթանյահուի գլխավորած «Լիկուդ» կուսակցությունը ներկայացուցնող վերոհիշյալ նախարարը ռադիոեթերում հայտնել է, որ թեև Իրանի տնտեսության վերականգնումը որոշակի մտահոգություններ է առաջացնում, իրեն առավելապես անհանգստացնում է այն ուժային առանցքը, որը, ըստ նրա, ձևավորվել է համաձայնության շուրջ։
«Ձևավորվող համաձայնությունը մտահոգիչ է, սակայն ինձ ամենաքիչը մտահոգում է Իրանի տնտեսության վերականգնումը։ Ինձ շատ ավելի է անհանգստացնում այն առանցքը, որը ձևավորել է այս համաձայնությունը՝ Թուրքիան, Կատարը և Պակիստանը։ Մեր աչքի առաջ նոր առանցք է ձևավորվում»,- նշել է իսրայելցի նախարարը։
Հարկ է նշել, որ թուրքական մամուլը լայնորեն լուսաբանել է իսրայելցի պաշտոնյայի հայտարարությունը՝ այն ներկայացնելով որպես Իսրայելի մտահոգություն Թուրքիայի, Կատարի և Պակիստանի միջև ձևավորվող համագործակցության նկատմամբ։
Հիշեցնենք, որ Պակիստանի վարչապետ Շահբազ Շարիֆը հունիսի 15-ին հայտնել էր, որ ԱՄՆ-ն և Իրանը բանակցությունների արդյունքում համաձայնության են եկել դադարեցնել բախումները բոլոր ուղղություններով, այդ թվում՝ Լիբանանի ճակատում։
Ավելի ուշ Պակիստանի՝ Թուրքիայում դեսպան Յուսուֆ Ջունեյդը նշել էր, որ համաձայնության ձեռքբերման գործընթացում Իսլամաբադը և Անկարան սերտ կապի մեջ են եղել և բազմաթիվ հարցերի շուրջ հանդես են եկել համատեղ դիրքորոշմամբ։
